നാളുകളോരോന്നുമോടിയൊളിക്കുമീ
നീണ്ട നിഴലുകൾ തിങ്ങുന്ന പാതയിൽ,
നീറുന്നൊരോർമ്മയും നോവിച്ചിടാത്തൊരു
നാളെകൾ തേടിയലയുകയാണുഞാൻ!

അറിയായ്കയല്ല ഞാൻ രൂപാന്തരങ്ങളെ,
മാറും ഋതുക്കൾ തൻ രംഗഭേദങ്ങളെ.
കാണായ്കയല്ല ഞാൻ മണ്ണിലും വിണ്ണിലും 
എന്നിലും, കാലം വരച്ച ചിത്രങ്ങളെ .

കൗമാരകുത്സിതമാകും കുസൃതികൾ ,
താരുണ്യമോലും തുടിപ്പുകളൊക്കെയും,
ചോർന്നും തളർന്നും പിടഞ്ഞുമെൻ കൺകളിൽ
നേർത്ത പരിഭവമായങ്ങൊതുങ്ങിടും.

എങ്കിലും തേടാതിരിക്കുവാനാകുമോ ?
കാലങ്ങളായിക്കൊതിച്ച പൂങ്കാവനം.
വർണ്ണങ്ങളൊക്കെ കളഞ്ഞൊരെൻ പൂമരം
എന്നെയും നോക്കിയിരിക്കാതിരിക്കുമോ ?

ഉണ്ടായിരിക്കാം വസന്തങ്ങൾ പിന്നെയും
അന്നെന്റെ മുന്നിലായ് പൂക്കൾ വിരിക്കുവാൻ.
ഇല്ലെങ്കിൽ ധന്യമാമൊരുമാത്രയെങ്കിലും
ഒരുപിടി പൂക്കളായ് മാറാതിരിക്കുമോ ?