വിണ്ണിന്റെ ദിവ്യമാം നാദമേളത്തിൽനി-

ന്നറിയാതെ വീണുപോയ് ഈണങ്ങളെത്രയോ 

മണ്ണിന്റെ മാറിലലിഞ്ഞവയൊക്കെയും 

സംവത്സരങ്ങൾതൻ സങ്കീർത്തനങ്ങളായ് !

അരമാത്ര മാത്രമെന്നരികത്തുവന്നുപി- 

ന്നകലങ്ങൾ പൂകിയോരാ ഗാനമാധുരി 

ഒരുമാത്രപോലും പിരിഞ്ഞില്ല പിന്നെയെൻ 

ഹൃദയത്തിലെന്തേ കലർന്നുപോയീവിധം!

കാതോർത്തിരിപ്പുഞാനെത്രയോ കാലമായ്

ആ നാദവീചികളെന്നെത്തഴുകുവാൻ 

വാക്കുകൾകൊണ്ടു വികലമാകാത്തൊരാ 

സമ്പൂർണ്ണഗീതകമെന്തെന്നറിയുവാൻ !