പാടാൻ കൊതിച്ചൊരെൻ നെഞ്ചിലിന്നെന്തിനോ
ഇഴയും നിശ്ശബ്ദത കൂടുകെട്ടി.
ഈണങ്ങളാകാൻ കൊതിച്ചോരു വരികളെ
ചിന്തകൾ വന്നു ഞെരിക്കയായി.
കീമോ കരിച്ചുകളയുന്നത് എന്റെ ധമനികളിലെ light chain amyloid ഉണ്ടാക്കുന്ന രക്തകണങ്ങളെ മാത്രമല്ല, വാക്കുകളെ കൂടിയാണ്.
എണ്ണിക്കൊണ്ടിരുന്ന ദിവസങ്ങൾ ആഴ്ച്ചകളും മാസങ്ങളും ആയിമാറുകയാണ്. ഇനിയെത്ര മാസങ്ങൾ!
അവസാനം കാണാനാകുന്നില്ല!
വാക്കുകൾപോലും വഴുതിപ്പോകുകയാണ്!
ഈ സൂചിമുനകളെൻ സിരകളോടിന്നിതാ
വീണ്ടും സ്വകാര്യം പറഞ്ഞിരിക്കെ,
കാണുകയായി ഞാൻ മായിക നിദ്രയിൽ
എന്നോ മറഞ്ഞൊരാ പൂവനികൾ !
